വിദേശികളുമായുള്ള വിവാഹത്തില്‍ ജനിച്ച കുട്ടികള്ക്ക് ഇന്ത്യന്‍ പാസ്പോര്ട്ട് നല്കാം

വിദേശികളുമായുള്ള വിവാഹത്തില്‍ ജനിച്ച കുട്ടികള്‍ക്ക് ഇന്ത്യന്‍ പാസ്പോര്‍ട്ട് നല്‍കാം Published By.madhyamam.com on Sun, 02/24/2013 - byഹാഷിം എളമരം മനാമ: വിദേശത്ത് കഴിയുന്ന ഇന്ത്യന്‍ പൗരന്മാര്‍ക്ക് വിദേശികളുമായുള്ള വിവാഹത്തില്‍ ജനിച്ച കുട്ടികള്‍ക്ക് ഇന്ത്യന്‍ പാസ്പോര്‍ട്ടിന് അവകാശമുണ്ടെന്ന് ദല്‍ഹി ഹൈകോടതി സുപ്രധാന വിധിയില്‍ വ്യക്തമാക്കി. ബഹ്റൈനിലെ മൂന്നു രക്ഷിതാക്കള്‍ സമര്‍പ്പിച്ച റിട്ട് ഹരജി തീര്‍പ്പാക്കിക്കൊണ്ടുള്ള വിധിയിലാണ് കോടതി ഇക്കാര്യം വ്യക്തമാക്കിയത്. കോടതിയെ സമീപിച്ച മൂന്നുപേരുടെ അഞ്ചു മക്കള്‍ക്കും 12 ആഴ്ചക്കകം പാസ്പോര്‍ട്ട് നല്‍കാന്‍ കോടതി വിദേശകാര്യ മന്ത്രാലയത്തിന് നിര്‍ദേശം നല്‍കി. കോടതിവിധി ഗള്‍ഫ് രാജ്യങ്ങള്‍ ഉള്‍പ്പെടെ വിദേശരാജ്യങ്ങളിലെ ആയിരക്കണക്കിന് ഇന്ത്യന്‍ പൗരന്മാര്‍ക്ക് പ്രയോജനം ചെയ്യും. ബഹ്റൈനിലെ മുംബൈ സ്വദേശി അബൂബക്കര്‍, ഗോവക്കാരനായ ആന്‍റണി ദാന്‍റിസ്, മലയാളിയായ ഹുസൈന്‍ ആദം എന്നിവരാണ് കോടതിയെ സമീപിച്ചത്. അബൂബക്കറിന്‍െറ മക്കളായ ഇമാം മുഹമ്മദ് റഫീഖ് അബൂബക്കര്‍, ജാഫര്‍ മുഹമ്മദ് റഫീഖ് അബൂബക്കര്‍, ആന്‍റണി ദാന്‍റിസിന്‍െറ മക്കളായ പോള്‍ റോഷന്‍ ദാന്‍റിസ്, സസ്ത്തിക മിഷാല്‍ ദാന്‍റിസ്, ഹുസൈന്‍ ആദം കുട്ടിയുടെ മകള്‍ ഫാത്തിമ എന്നിവരുടെ പാസ്പോര്‍ട്ട് അപേക്ഷകളാണ് ബഹ്റൈനിലെ ഇന്ത്യന്‍ എംബസി നിരസിച്ചിരുന്നത്. ഇന്ത്യക്കാരായ രക്ഷിതാക്കളുടെ മക്കളാണെങ്കിലും അവരുടെ ജനനം ഇന്ത്യന്‍ എംബസിയില്‍ രജിസ്റ്റര്‍ ചെയ്തിരുന്നില്ല. 18 വയസ്സാകുന്നതുവരെ ഇവര്‍ പാസ്പോര്‍ട്ടിന് അപേക്ഷ നല്‍കിയിരുന്നുമില്ല. പാസ്പോര്‍ട്ടോ മറ്റ് രേഖകളോ ഇല്ലാതെയായിരുന്നു ഇവര്‍ താമസിച്ചിരുന്നത്. ഇക്കാരണത്താലാണ് ഇവരുടെ അപേക്ഷ എംബസി നിരസിച്ചത്. ഇന്ത്യയില്‍ പോയി ഒരു വര്‍ഷം താമസിക്കുകയും അവിടെ പൗരത്വത്തിനുള്ള രേഖകള്‍ സമ്പാദിക്കുകയും ചെയ്താല്‍ മാത്രമേ ഇവര്‍ക്ക് പാസ്പോര്‍ട്ട് നല്‍കൂവെന്നായിരുന്നു എംബസി അറിയിച്ചിരുന്നത്.